O le Aso Faraile o le vaiaso nei i le motu o Savaii ae o le Aso Gafua ma le Aso Lua o le vaiaso fou i Upolu, e pei ona iai suiga ua faailoa e se ofisa sinia o le Matāgaluega o Tinā ma Tama’ita’i, o le a fono ai ta’ita’ifono filifilia o komiti a Fono Faavae i Puleono ma Tumua faatasi ai ma sui o komiti ua filifilia, ma le pulega o le Matāgaluega o Tinā ma Tama’ita’i Atina’e o Afio’aga ma Aga Fesoota’i o loo pulea le faagasologa o le poloketi o le miliona tālā.
O lea fono o le a taualuga i Savaii, ma o le faamoemoe autū e talanoaina ta’iala o galuega o le poloketi faapea nisi o matāupu lautele o loo fesiligia ai suiga ua faatula’i nei e le malo e faafoe ai le poloketi mo le isi lima tausaga.
O le ta’ita’i o le patī faaupufai o le Samoa ua Potopoto ma le faipule o le itumalo o Lotofaga le afioga Fiame Naomi Mataafa, ua ia faitioina i sana tusi ua tauaao e le Ofisa Sili o le matāgaluega o loo vaaia le poloketi, suiga i le filifiliga o ta’ita’ifono ma le filifilia o sui o komiti o Fono Faavae.
Faaalia e Fiame o le 11 o itumalo o loo ta’ilua ta’ita’ifono ua faavasega ai o le ta’ita’ifono A ma le ta’ita’ifono B.
I lona itumalo o ia le ta’ita’ifono A ae to’atele sui o le komiti e filifilia e le ta’ita’ifono B o le sui sa tauva mo le faatuatua i le Atua Samoa ua tasi i le palota tele ia Aokuso.
O le Sa’ofaapito e to’aono sui o le komiti na te filifilia ae to’avalu sui e fili e le ta’ita’ifono B.
O lea suiga fou i le filiina o sui o komiti ua faamatalaina e le faipule o Lotofaga sa avea ma Palemia i le faigāmalo muamua a le Faatuatua i le Atua Samoa ua Tasi, e faapito ma faailoga tagata.
O itumalo e 41 e ta’itasi ta’ita’ifono o faipule o le vaega faaupufai o loo tu nei i le foe o le malo ae o itumalo e sefulutasi e ta’i lua ta’ita’ifono ua taua o ta’ita’ifono soofaatasi.
Ua fesiligia ai e le afioga i le Sa’ofaapito i lana tusi i le Ofisa Sili o le Matāgaluega o Tinā ma Tama’ita’i, Atina’e o Afio’aga ma Aga Fesoota’i, lona tulaga o le faipule na filifilia e le itumalo.
Faaalia e le afioga Fiame Naomi Mataafa sa talosaga i le tofiga ta’ita’ifono ae lē o se tofiga ta’ita’ifono soofaatasi e pei ona sa faasalalau ai e le matāgaluega le avanoa mo sui sa tauva i le palota ma faipule o itumalo e talosaga.
O loo lagolagoina malosi e le faipule o Lotofaga le poloketi, ae o suiga ua faatula’i mai mo le isi lima tausaga o loo ia talosagaina le Kapeneta ma le Komiti Faatonu o le poloketi e tatau ona toe silasila toto’a iai poo fetaui ma talafeagai.
O loo fesiligia foi e le ta’ita’i ma le vaega faaupufai e puipuia aiā tatau a tagata le auala ua faatino ai suiga i le filifilia o ta’ita’ifono ma sui o komiti faafoe o le poloketi.
Ma ua faaulu ai i le faamasinoga se finauga faaletulafono e lea vaega faaupufai e iloilo ai lana mau e pitotasi ma faaitu’au suiga ua faia e le malo i le poloketi.
O le feiloa’iga a tusitala ma le Palemia i le vaiaso ua mavae sa ia faamanatu ai le folafolaga a lana patī faaupufai a o faagasolo faatosina o le palota tele ia Aokuso na te’a nei, o le mau tauave sa faailoa e le Faatuatua i le Atua Samoa ua Tasi pe a manumālō e avea ma faigāmalo, o tagata o le vaega faaupufai e ta’ita’ia ma vaaia le poloketi o le miliona.
