Ua sauni atu le aulakapi a tama’ita’i a le atunuu ua faaigoaina o le Penina Samoa e feiloa’i ma le ‘au a tama’ita’i o le motu tuaoi o Tonga ua faaigoa foi o le Penina Tonga.
O se tasi lea o taumafaiga e siitia le atina’e o le lakapi mo le itupa o tama’ita’i e pei ona lotolotoi ai le malo o Ausetalia i le faatinoina o lea taumafaiga.
Sa faalauiloa i le afiafi o le Aso Lua o le vaiaso nei le ‘au o le Penina Samoa o le a taaalo ma le Penina Tonga i le Aso Faraile o le vaiaso nei.
O lea taaloga o se avanoa lelei e lē gata e atina’e ai le lakapi mo tama’ita’i ae sa’ili ai foi nisi tama’ita’i mo le aulakapi o le Manusina.
O le Pelesetene lē tumau o le pulega o le Lakapi Samoa ma le Sui Komesina Maualuga o Ausetalia i Samoa sa saunoa i le faalauiloaina o le ‘au o le Penina Samoa lea sa faailoa ai e le sui o lea malo le tāua o le polokalame o le a una’ia ai le taaloga lakapi ae fesoasoani ai foi i le Lakapi Samoa ma ana polokalame o loo una’ia ai le atina’e o le taaloga i lo tatou atunuu.
E to’a 28 tama’ita’i ua filifilia i le Penina Samoa ma le pulega e to’asefulu.
O Filoi Eneliko o le faia’oga ulu lea o le aulakapi a tama’ita’i o le atunuu.
