Ua faia se faamatalaga a le Palemia o le Atu Solomona, Manasseh Sogavare o le a lē faia e lona atunuu se mea e lamatia ai se sui o le Pacific Islands Forum.

O lana faamatalaga lea na faia i le RNZ Pacific i Suva ma ia ta’ua ai o le Atu Solomona o se vaega tumau o le aiga faa-Pasefika. E pei ona silafia sa sainia se maliega i le va o Honiara ma Beijing lea sa popole iai atunuu e pei o Niu Sila ma Ausetalia ma Amerika ina ne’i matala ai se avanoa mo Saina e fausia ai se nofoaga faamiliteli i le vasa Pasefika.  

Na ia ta’ua foi i le ofisa faasalalau o le a ia faamautinoa i le vaiaso nei i Suva tulaga o le maliega ma Saina ma o le a lē faatagaina lava e lona atunuu se isi atunuu e faatuina sona ofisa faamiliteli i lona atunuu.