O ananafi na feiloai ai le Tausala o Samoa ia Moemoana Safaatoʻa Schwenke ma ofisa faasalalau e faalauiloa ana tapenaga auā le sailia o se Lalelei o le Pasefika o le a faia lea i Nauru.
O se faailoga tau tomai o suesuega faaleaganuu ma mataupu tau i le siosiomaga o loo umia e le tausala o Samoa.
E fitu atunuu o le a saili iai se lalelei o le Pasefika o lenei tausaga.
Sa faailoa e Moemoana i le aufaasalalau le tāua o lenei tauvaga e lē gata o se tauvaga ae o le a atili faamamalu ai tū ma aganuu a atunuu o le Pasefika.
Na ia faailoa foi le tāua o le vaiaso ua tuanai lea sa ia toe agai ai i ona aiga i le motu tele i Salafai, e le gata o se faamalosiau ma se faamanuiaga ae o se faaosofiaga lelei lea ina ia tumau le lototele ma le naunautaʻi e finau ai i le pale o le Pasefika.
O tausala o le a auai e aofia ai le tamaitai mai Amerika Samoa, le Tausala o le Atu Malesala, le Tausala o Palau, le Tausala o Papua Niu Kini, le Tausala o Tonga, le Tausala o Nauru faapea ma le Tausala o Samoa.
O le uluai taimi lenei i le talafaasolopito o le tauvaga o le a talimalo ai Nauru, ae o le uluai taimi foi i le 35 tausaga o le tauvaga o le a faia ai i totonu o se atunuu i le Atu Maikorenisia.
