I le tolopō mai ai o le palota laitiiti a Safata 1 i le masina o Ianuari sa faasilasila aloa’ia ai e le Komesina o faigāpalota e māfua i se faai’uga a le Kapeneta, o lea ua toe aumai le isi faasilasilaga faalaua’itele mai le Komesina ma ua faaloa ai aso o le a faataunuu ai lea faigā filifiliga ae o le a faia faatasi ai ma le palota laititi a le itumalo palota o Vaisigano 2.
O faasilasilaga faalaua’itele e lua ua tuuina mai e le Komesina o faigāpalota le afioga Toleafoa Tuiafelolo Alexander John Stanley o loo faailoa ai o Safata 1 ma Vaisigano 2 o le a faatino a la faigāpalota laiti i le Aso Faraile 27 o le masina nei o Fepuari.
O le Aso Faraile o le vaiaso nei le aso 6 o Fepuari i le 9 i le taeao e amata ai ona faaulu suafa o sui faatutū poo sui tauva mo faigā filifiliga a ia itumalo ma le faamoemoe e ta le 4 o le aso lava lea ua tapunia.
O le Aso Tofi 12 o Fepuari e faagata ai le avanoa e toe faaui ai i tua ni suafa o sui faatutū.
O le palota muamua poo le prepolling mo ia palota laiti e lua o le Aso Lulu 25 o Fepuari 2026.
O loo taoto pea i le faamasinoga o faigāpalota le tagi tau palota mai Falealili 1 e le’i mae’a, ma o le matāupu lea na māfua ai ona tolopo le palota laitiiti a Safata 1.
O Vaisigano 2 ua māfua ona toe faia lana filifiliga mo sona tofi i le Palemene ona ua faamavae lē sa filifilia mai le palota tele ia Aokuso o le tausaga na te’a nei.
O le faamavaega na māfua mai ina ua momoli e le itumalo le afioga Motuopuaa Seve Henney Afereti Papalii i le patī faaupufai o le Faatuatua i le Atua Samoa ua Tasi.
Sa avea le tofi o Vaisigano 2 ma sui faipule tuto’atasi ma o lona ulufale e fia lagolago i lea vaega faaupufai ua soli ai aiaiga o tulafono tumau ma le tulafono o faigāpalota i le noatia o se faipule o se patī poo se tuto’atasi ona lagolago i se patī faaupufai ae ua mae’a ona faatauto ma aloa’ia lona tulaga i le Palemene.
O le māfua’aga lea o le faagafua o le nofoa o Vaisigano 2 i se faai’uga a le Fofoga Fetalai ma toe faia ai le palota laitiiti a lea itumalo.
