A o iai i lenei vaiaso tāua mo le faamanatuina lea o aiātatau a fanau uma i le lalolagi, o se faamoemoe lea na tuufaatasia e le Matagaluega o Tina ma Tamai aemaise o ana paaga e faasoa ai manatu ma lagona i nisi o mataupu e patino i fanau.
Na tatala aloaia lea i le saunoaga a le Minisita o le Matagaluega, Afioga Mulipola Anarosa Ale Molioo.
“O le faamoemoe ia faalauaiteleina le malamalama o tagata uma aemaise fanau ia latou aiātatau faatagata soifua poo a latou faamanuiaga faavae e pei ona iai le autu o le faamoemoe i lenei tausaga o faamanuaiga faavae o le soifua e mo fanau uma.
“E tatalo atu ai i le fanau ia talanoa tatala ma ia aua ne’i taomia ni manatu ma ni lagona ona o le auai o tagata matutua i lenei faatasiga auā lau aiātatau o lou ola tuputupu a’e i totonu o se siosiomaga e malupuipuia ma saogalemu mai sauaga.”
O le 1994 na sainia ai e Samoa le feagaiga faavaomalo mo aiātatau a tamaiti ma fanau ma ua savali le 29 tausaga o faatino taumafaiga a le Malo.
“E taulai lea i le faatāua o aiātatau o alo ma fanau, e pei ona iai tulafono ma faiga faavae e puipuia ai fanau.
“Ia faamalosia le auai o fanau i aoga ma le aooga fua i aoga a le Malo, o polokalame faaauau a le Malo, e faamatuu atu iai fesoasoani mo aoga uma amata, aoga a fanauiti seia oo i Kolisi maualuluga.
“E lē o faapito na o aoga a le Malo e aofia ai foi ma aoga o matata eseese ma aoga faapitoa mo fanau e iai aafiaga tumau o le soifua.
“Ae o loo manaomia pea le galulue faatasi o tatou uma ma le fanau e sailia ai ni tali o nisi o faafitauli o feagai pea ma alo ma fanau.”
A o iai pea Samoa i ana taumagaiga ina ia faamausali le lagolagosua i le faatāuaina o aiātatau a fanau sa faailoa ai e le Minisita nisi o vaega o loo galulue ai.
“O nei taumafaiga e aofia ai le saga faaleleia o le ulufale atu o tamaiti uma e iai aafiaga tumau o le soifua i aoga, e mataituina lelei le ogatasi o faiga faavae i le tausia lelei ma le puipuia o tamaiti ma aiaiga o le feagaiga pasia loa ia faiga faavae.
“Ia lava vaega tupe ua fuafuaina i le faatinoga o aiātatau a tamaiti mai a tatou paaga ma le Malo ma ave iai le faamuamua.”
O le faamalosiau ina ia galulue faatasi ia mautinoa le maua e alo ma fanau a Samoa o avanoa tāua auā se lumanai manuia.
