Ua faafetaia e le pasese e to’asefuluono sa malaga i se malaga mai Apia mo Amerika Samoa le mata’alia o pailate sa faafoeina le latou faigāmalaga, ina ua toe foi ane ma tulaueleele i le malae vaalele i Fagalii ina ua fetaui le isu o le vaalele ma ni manulele.
Na tupu lea tulaga e pei ona faailoa e le kamupami vaalele o le Samoa Airways ae ua oo le maualuga o le vaa i le 400 mita mai le laueleele ina ua malaga ese ma Fagalii.
Na toe faia le faai’uga a pailate e toe foi e tulaueleele mo le siakiina o le vaalele lea na taunuu ma le saogalemu.
Sa faia ai loa ma feutana’iga mo se isi malaga e faaauau ai le faigāmalaga a le pasese e to’asefuluono, ae galulue inisinia mo le siakiina o le vaalele.
Faaalia e le kamupani vaalele o le saogalemu e sili ona faamuamua i lana tautua ma ua ave ai le faafetai ma le faamālō i lana aufaigaluega sa feagai ma le faaletonu na tula’i mai i le Aso Faraile na te’a nei.
