A o lumana’i se taimi e toe fausia ai se faleoloa tele hypermarket o le kamupani o Frankies i le nofoaga i Vaitele tai sa iai le faleoloa ua faatama’ia e le malaia poo le afi i se vaiaso e le’i mamao tele atu, ua faailoa e le pulega a lea kamupani tele i Samoa o le nofoaga o loo iai lona faleoloa mo oloa faufale ma oloa mo laoa ma maota o le a tapena e faaauau ai lana hypermarket.
O le isi lua masina o muamua nei e tatau ona tatala ai lona faleoloa lea ma toe maua ai le auaunaga masani a le kamupani ua motusia i lea nofoaga ina ua mū lona faleoloa tele.
O loo faagasolo lava su’esu’ega e maua ai le māfua’aga o le mū ae ua faailoa e le kamupani, o faaseā i le manogi mai le faleoloa ua faatama’ia o loo faamuamua le saogalemū o tagata faigaluega sa galulue i le la’ueseina o oloa tuu’aisa ma oloa tau taumafa sa māfua ai le manogi o loo faitio ai nisi o aiga ma pisinisi tuaoi.
Ua faailoa e le kamupani i se pepa o faamatalaga o le tasi lea o lana faamuamua o le si’osi’omaga mamā ma le soifua mālōlōina o tagata lautele.
