Ua iai nei se fesoota’iga fou ua faalauiloa e le pulega o tagata tafafao mai i Samoa, i le faamoemoe e vave maua ai faamatalaga talitonuina ma faatuatuaina e tagata tafafao i fafo, e faatatau ia Samoa aemaise o isi auaunaga tau pisinisi e fesoota’i i le atina’e o tulisi poo tagata tafafao mai i Samoa.
O le Samoa App o se fesoota’iga sa fausia ma tuufaatasia e le kamupani o le South Pacific Broadband sa galulue faatasi ai ma le pulega o tagata tafafao le Samoa Tourism Authority ma sa faalauiloa aloa’ia i le masina ua mavae.
Faaalia e le pulega o lea kamupani o le fesoota’iga o le Samoa App e lē gata ina maua ai e tagata tafafao o isi atunuu e fia iloa atili faamatalaga ia Samoa ae ua faalauiloa ai foi ma pisinisi eseese i Samoa o se auala e iloa ma silafia ai e le lalolagi o le atina’e o tulisi pisinisi e pei o faletalimalo o loo faagaioia i Samoa.
O loo fuafua le kamupani o le South Pacific Broadband e galulue e fausia foi se fesoota’iga faapea mo atunuu e pei o Tonga, Vanuatu, Fiti, Atu Kuki, Atu Solomona ma Papua Niu Kini.
