Ta’utino e le vaega o le Corrections le faaletonu o latou, ina ua silia ma le lua vaiaso o faagasolo a latou su’esu’ega i se alii ofisa o le vaega o le faanofo vaavaaia poo le probation officer, i ni tuua’iga o soligatulafono child sex offending, ae aunoa ma se faailoaina ia i latou o loo pulea le vaega sa galue ai lea alii ofisa.
Ta’ua e le minisita o le Corrections, Mark Mitchell, e lē taliaina ma lē fetaui lea faai’uga sa faia o le lē vave faailoa ia i latou o iai i tulaga pule, o tuua’iga sa faia faasaga i le tagata faigaluega.
O le masina talu ai na loka mai ai lea alii ina ua faamautū moliaga e valu, e aofia ai moliaga e fā o le faia o feusua’iga (sexual violation), ma isi moliaga e fā o le faia o se gaioiga matagā faaleituaiga (an indecent act).
Na loka mai lenei alii ofisa ma tula’i ai i luma o le faamasinoga i le aso lava na sosoo ai, ma sa taofia le faailoa o lona suafa, ma e tusa ai ma lipoti mai le RNZ, o lea ua maliu lenei tagata.
Saunoa le tama’ita’i sa avea ma Corrections acting deputy chief executive mo le komiuniti, partnerships and pathways, Lynette Cave, e matuā lē māmā i le Corrections soo se tuua’iga e aofia ai amioga matagā nei ma soligatulafono o faiga tau feusua’iga.
Sa vave ona galulue le Corrections e sa’ili uma faamatalaga e fesoasoani i le galuega su’esu’e a leoleo, ae pagā lea, ua lape latou ina ua lē faailoa i regional managers sa galue ai lenei alii ofisa, le su’esu’ega sa faagasolo.
Ua ta’utino e le vaega a le Corrections lo latou lape, ma ua taumafai foi e faaleleia le faagasologa o a latou galuega ina ia taufai galulue felagolagoma’i ma tausisia i taimi uma le manino o fesoota’iga ma le faailoaina o matāupu e tagofia.
Puna o Faamatalaga: https://www.rnz.co.nz/news/national/585734/corrections-didn-t-tell-staffer-s-managers-of-investigation-into-his-alleged-child-sex-offending
