Fai mai le taitai o le vaega faaupufai a le NZ First, Winston Peters, o le a fai lava e le aupalota le faaiuga o le ituaiga faigamalo o le a iai pe a mae’a le palota.
O le tali lea a Peters i le faamatalaga a le taitai o le National o Christopher Luxon sa ia faailoa ai o loo avanoa lava le latou vaega faaupufai e galulue faatasi ma Peters.
I se faatalanoaga na faia a Luxon sa ia ta’ua ai i le social media o loo malosi lona naunautaiga i se soofaatasi mautu ma malosi faatasi ma le vaega faaupufai a le ACT ae peitai afai ae toe tulai mai le NZ First i le Palemene ona manaomia lea ona ia fesootai ia Peters.
Lea la ua tali mai iai Peters i le faatalanoaga i le 1News, o le aupalota e faia le faaiuga.
Na fesiligia foi le taitai o le NZ First poo fea le itu o le a agai iai lana vaega faaupufai pe afai e manuia i le palota, tali Peters faatoa iloa le tulaga lea pe a maua le iuga o le palota.
