Ua toe aveesea le poloaiga a le faamasinoga faaitumalo na taofia ai ona tuua le atunuu e le sui faipule o Faleata 3, ina ua toe iloilo le poloaiga i le faamasinoga sili.
Ua mafai ai nei ona tuua Samoa e le tofa Lealailepule Rimoni Aiafi, e pei ona ia faailoa i luga o fesootaiga televavave a le vaega e puipuia aiātatau a tagata.
Le tofa Lealailepule Rimoni Aiafi. O le valaauina o le tagi tau palota a le itumalo o Vaimauga 3 i le amataga o le vaiaso, na faailoa ai e le loia o loo tauaveina le itu o loo molia e le itu tagi na tuuina atu ai i luma o le faamasinoga le poloaiga ua mae’a ona saini ai se faamasino o le faamasinoga faaitumalo.
Peitai na faaalia e le faamasino o le faamasinoga sili le susuga Leiataualesa Darrel Clarke o le a toe silasila iai i le poloaiga, e pei ona faia iai le faaiuga e aveesea.
