I le silia ai i le 4 tausaga o avea le Susuga Su’a Hellene Wallwork ma Loia Sili a lo tatou malo, o le Aso Lua o le vaiaso nei na ia tuua ai lea tofiga sa amata galue ai i le masna o Setema o le tausaga e 2021.
O ia ua to’atolu iai tama’ita’i loia o le atunuu ua tauaveina lea tofiga maualuga i le malo.
Sa ulua’i galue o ia i le tofiga Loia Sili a le malo mo se taimi lē tumau ina ua faamuta le taimi galue o se isi tama’ita’i sa avea ma Loia Sili i se faai’uga a le malo, ae o le tausaga e 2022 ina ua mae’a ona faasalalau le avanoa na filifilia ai loa Su’a e tauaveina le tofiga mo le 3 tausaga o lana konekarate lea ua mae’a i le masina amata o lenei tausaga fou.
O lona taimi sa amata galue ai e tele lu’itau sa feagai ma ia i le tele o matāupu tau faamasinoga sa ia finauina ai le mau a le malo, amata mai i le mae’a o le palota tele o le 2021 ma tulaga lē mautonu na tula’i mai ai, faasolo mai ai i matāupu tau faamasinoga sa lu’iina ai nisi o vaega o le tulafono faavae.
E pei o le 10 pasene o nofoa o tama’ita’i i le Palemene, teuteuga o le faavae ua toe tasi ai le pulega o galuega a le Faamasinoga o Fanua ma Suafa, ma le palota o le Fofoga Fetalai na maua ai le lua vae tolu na pasia ai teuteuga o le faavae na aveesea ai suiga o le faavae na pasia e le Palemene i le tausaga e 2020.
O le Aso Lua o lenei vaiaso na faamavae atu ai le aufaigaluega ma loia o galulue i le ofisa o le Loia Sili i le susuga Su’a Hellene Wallwork e lē o toe talosaga i le avanoa Loia Sili a le malo.
O le tasi lea o tofiga o le a tālia ai se finagalo o le Kapeneta faapea ma le Komesina o le Matāgaluega o Leoleo, Falepuipui ma le Toefuata’ina.
