O le iuni e tulai mo tagata faigaluega i falema’i ma auaunaga e tausia ai tagata matutua, ua manana’o foi ina ia suia le umi e faanofoesea ai le tagata pe a aafia i le Koviti-19.
O le fonotaga a le Kapeneta ua fuafua mo le aso a taeao e talitonuina e talanoa ai le mataupu lea ae o le premier o Niu Sa Uelese, Dominic Perrottet o loo taulamua i le una’ia o le mataupu lea ia faaitiitia mai le taimi faanofoesea mai le fitu aso i le lima aso.
E manatu le peresitene o le iuni lea, Gerard Hayes afai ae leai ni āuga i se tagata, e tatau ona mafai ona faigaluega ma o le a fesoasoani iai tupuipui e malupuipuia ai le komiuniti.
E manatu le epidemiologist o Nancy Baxter mai le Iunivesite o Melepone, ua vave tele ona faaitiitia mai le taimi faanofoesea o le faama’i ma afai ae vave faataatia ese ia tulafono, e lē taumate o le a vave ona toe pepesi tele le faama’i i fale faigaluega ma isi nofoaga.
