Ua mae’a le fonotaga a sui o le malo tele o Amerika ma sui o Ukraine sa faia i Miami ma ua saunoa ai le failautusi o Amerika, Marco Rubio o le mataupu lenei e mā’ale’ale ma e faigata foi ma e tele mea e fetu’una’i ma e tatau lava ona iai Lusia i totonu o so’o se maliega e faamuta ai le taua i Ukraine.
Fai mai Rubio sa tulaga lelei le talanoaga ae e tele lava isi mea e fia faamautū, ma ua fuafua e faimalaga le sui faapitoa a Amerika, Steve Witkoff i Moscow mo talanoaga i lenei vaiaso.
Tā’ua e Rubio e le gata o loo o latou galulue e faamuta le taua i Ukraine, ae o le vaai mamao foi mo ni tulaga lelei mo lea atunuu ina ia faatumauina lona tutoatasi, ma le soifua lelei o tagata.
Ua faailoa i le CNN se finagalo o le ta’ita’i o le au usufono mai Ukraine e faapea o mea tonu ia o loo saili e lo latou atunuu, ae teena pea le tuuina atu o nisi o ona teritori e le o nofoia e Lusia ina ia pulea e lea atunuu.
O le faamatalaga mulimuli mai ia Putin sa ia tā’ua ai e faatoa faauma le taua i Ukraine pe a o ese mai fitafita a Ukraine mai teritori o loo latou nofoia.
Puna o Faamatalaga: https://edition.cnn.com/2025/11/30/europe/ukraine-russia-peace-talks-miami-florida-intl
