O le toe tatala o faitoto’a o potu faamasino i lenei masina fou mo galuega masani a le Faamasinoga Maualuga ma le Faamasinoga Faaitumalo, ua amata ai ma taualumaga o matāupu tau moliaga tau solitulafono o loo tuua’ia ai le silia i le to’aselau sa taofia mai osofa’iga sa maua ai fuālaau faasāina o le ‘aisa ma le maruana mai le masina o Tesema, se’ia oo mai ia Ianuari o lenei tausaga.
O le Aso Gafua lenei le aso 2 o Fepuari e amata tutula’i ai i latou ua molia lea e silia i le to’aselau, ae o isi e tutula’i i le aso 9, ae o isi o le Aso Gafua 16 o Fepuari.
O faamaumauga ua faailoa e le Sui Komesina o Leoleo, Falepuipui ma le Toe Fuata’ina, susuga Leiataualesa Samuelu Afamasaga ua 25 osofa’iga tau fuālaau faasāina sa faatino talu mai Tesema o le tausaga na te’a nei, ma molia ma taofia ai i le vaaiga a leoleo le 92 alii ae 22 tama’ita’i.
O le aofa’iga atoa o ē ua molia i solitulafono tau fuālaau faasāina e 114 i le va o Tesema 2025 ma Ianuari o le 2026.
