O le Aso Gafua o lenei vaiaso fou ma le ulua’i vaiaso o le masina o Fepuari ua amata maua ai faamanuiaga tau tupe a le aufaisaofaga a le faalapotopotoga o le lumana’i manuia o tagata le NPF mai le 4 pasene o le faamanuiaga sa tauanau mai lava poo afea e maua ai ina ua toe a’e galuega o lenei tausaga fou.
O le Minisita o Tupe le afioga Mulipola Anarosa Ale Molioo ma le Ofisa Sili o le pulega o le NPF sa o la faailoa le faamanuiaga i le Aso Faraile ua mavae ma faamuta ai ma le tuufesilisili pea o le aufaisaofaga pe fia se pasene o le faamanuiaga e maua, ae o afea e maua ma amata tala ai.
O le 4 pasene atoa o le a maua e aunoa ma se vaega e alu i le saofaga peita’i o tagata faisaofaga o loo iai aitalafu tuua i le vaega o nonōgatupe lapopo’a poo big loans i le NPF, o le a lē maua se faamanuiaga ae tuusa’o e totogi ai se vaega o nonōgatupe o loo tau totogi faamae’a.
O lona uiga ua na o le aufaisaofaga i le vaega o nonōgatupe laiti e lē aafia.
Ua faailoa e le Minisita o Tupe e 43 miliona 584 afe 951 tālā le vaegatupe mai le NPF o le a faaalu i le totogiina atu o le faamanuiaga e 4 pasene mo le aufaisaofaga.
O se tufatufaga ua autū i le toe tapenaina o fanau a le aufaisaofaga mo le toe amatalia o a’oga o lenei tausaga fou 2026 lea ua toe a’e uma i le vaiaso lenei.
