O alii faamasino Niu Sila ia Robert Fisher ma Raynor Asher o le a feagai ma le tauaveina o sueusega o moliaga o le lē ava ma le lē migao i le faamasinoga poo le moliaga lea ua taua i le gagana faaperetania o le Contempt of Court.
O lea moliaga o loo tuuaia ai le susuga Tuilaepa Lupesoliai Sailele Malielegaoi sa avea ma Palemia, o le afioga ia Savalenoa Mareva Betham Annandale o le Loia SIli o le Malo, le afioga Leaupepe Toleafoa Faafisi sa avea ma Fofoga Fetalai ma le Failautusi o le Fono Aoao Faitulafono le afioga Tiatia Graeme Tualaulelei.
O moliaga nei e mafua mai i le poloaiga a le faamasinoga maualuga na faatonuina ai le tauaofiaga a le Palemene e usuia i le Aso 24 o Me peitia sa lē usitaia.
O le Aso Gafua o lenei vaiaso na faatulaga e valaau ai le mataupu peitai ua faailoa mai e le tamaitai Loia mo le vaega faaupufai a le FAST le afioga Taulapapa Brenda Heather Latu ua talosaga alii faamasino e toalua mai Niu Sila e manaomia le lava o se taimi sei faitau ma silasila ai i pepa o faamaumauga faapea mau faaletulafono a loia a itu auai ona faatoa iloa tonu ai lea o se aso e toe valaau ai lenei mataupu.
O le afioga i le faamasino ia Robert Fisher ua tele tausaga o galue i le faamasinoga o talosaga apili a Samoa ma ua lava lona silafia i le faafoeina o galuega a le faamasinoga i le atunuu.
