O le tusi lolomi fefiloi o le gagana Samoa le Samoan monolingual dictionary poo le tusi faasino’upu o le gagana Samoa, e lē o toe mamao ae amata faaaogā i le a’oa’oina o le tatou gagana i totonu o a’oga i Niu Sila.
Ua faailoa lea fuafuaga e se sui o le F.A.G.A.S.A. poo le faalapotopotoga mo le a’oa’oina o le gagana i Aotearoa a o lumana’i le faalauiloaina aloa’ia o lea tusi i Niu Sila i le aso 18 o le masina nei o Aperila.
Ua faailoa e le failautusi o le F.A.G.A.S.A. le faletua o Sauimalaetelemalanuola Ameteolepala Etelei i se lipoti a le nusipepa o le Sunday Samoan o se tusi tāua tele lea ua leva ona faatalitali iai le faalapotopotoga auā o lona tāua tele mo faia’oga o loo a’oa’oina le gagana Samoa i Niu Sila.
Ua ia faailoa ai foi o le faalauiloaina o le Tusi faasinoupu o le gagana Samoa o se sauniga ua faamoemoe e auai le ta’ita’i o le malo o Samoa le afioga i le Palemia ma le Minisita o A’oga ma Aganuu faapea ni ofisa sinia o lea matāgaluega.
O le masina na te’a nei na tauaao atu ai e le ta’ita’ifono o le Komisi o le Gagana Samoa se kopi o lea tusi lolomi fefiloi o le tatou gagana i le Lutena Kovana o Amerika Samoa a o faatāua e Amerika Samoa i le masina atoa o Mati le toe faaolaola o le tatou gagana Samoa aemaise o a tatou tu ma aganuu.
Sa faatāua foi i lo tatou atunuu le vaiaso o le gagana Samoa ma tu ma aganuu i le masina na te’a nei.
O le mau tauave a le Komisi o le Gagana Samoa, e lē puleesea le tatou gagana, o lona uiga e lē pulea mai fafo le gagana a Samoa.
