E lei faigofie i le fanau a le susuga ia Sooalo Manu ona talia le mea sa tupu mai i le latou tamā i Samoa i le nuu o Lefagaolaii i nai aso ua mavae atu. 

O le tulai mai o lenei faafitauli i le tamā ia Sooalo Manu na malaga ai lava lana fanau i Samoa ma le loto tiga e fia taui ma sui atu i tagata sa latou faia uiga lē alofa ma le matagā i le latou tamā. 

Ina ua taunuu le malaga a le fanau i Samoa, na malaga ane loa Sooalo Manu i Apia i lona aiga ma nofo ai ma taofi ai lana fanau e aua ne’i o i Savaii i le latou nuu, auā ua iloa lelei e Sooalo Manu le tiga o loto o lana fanau o loo malaga atu ma laua. 

Ta’ua e le tamā, e lua po o fai lana galuega faatasi ai ma lona aiga faapea nisi o le fanau i Samoa e tau faafilemu loto o lana fanau na malaga atu, alua’i alua’i talanoaga i lea afiafi tafa le finagalo o lona atalii laititi, ae pei o lona atalii matua sa tau faafaigata lona loto tiga ona e lē talia gofie i lona loto le mea sa tupu i lona tamā, ma sa iu ai lava ina fesili i lona tamā poo le ā le mea e manao e fai, ae tali atu Sooalo Manu, ia malilie oulua loto ia tausi le filemu, ma ia lua nonofo pea iinei ma lua toe foi ai lava i fafo i le mea o loo lua nonofo ai, aua lava ne’i alu se isi o oulua i Savaii. 

Afai ua ou ola, e tatau foi ona ola oulua, ae a lua o i Savaii e leai lava ma se tasi o oulua e toe foi i fafo, e te lua nonofo ai lava iinei auā e loka oulua e leoleo ma le malo pe a oo ina toe tupu mai se isi mea. 

Na iu ina talia e le fanau se tuualalo a le la tamā ma nisi o le aiga i Samoa, ma le agaga faafetai a le fanau, o le mea sili e taunuu atu le malaga o loo savali fiafia mai le tamā ia Sooalo Manu e faafeiloai laua i le taimi na taunuu atu ai le malaga. 

O le agaga moni o Sooalo Manu ia tausi le filemu ma lona nuu, o le ala foi lea o le latou feiloaiga ma le taitai leoleo ma le mamalu o le ofisa o leoleo i Tuasivi, ma lana tala i le ofisa o leoleo afai ua outou o atu e tausi le filemu o lea foi ua ou sau e tausi le filemu, aua ne’i toe gapa se mea, afai ua ou ola, e tatau foi ona ola la’u fanau, ia ola foi lo’u aiga ma lo’u nuu atoa o Samauga. 

O tuuaiga sese ua fai solo e uiga i ni upu sa lalafo i le Fesoasoani, ae na tali Sooalo Manu o ia e matuā nunumi i lona mafaufau ma ua tau valea lona faiai i lenei mea ua tupu mai i le la va ma le Fesoasoani, ma ua ia tatalo foi i le Atua e faailoa mai le uiga o lea mea ua ta’ua ai ni lafoga ua ia faia i le Fesoasoani. 

E mamā ia ma nei upu ua feaveai solo i ni lafoga sa ia faia i le Fesoasoani. 

O le upu moni sa alu e ave le tupe e fai ai le taumafataga a le susuga i le Fesoasoani ma lona faletua, e lē tele foi ni upu na talanoa ai, na uma lava ona tuu le tupe toe foi mai lona i lona fale. 

E leai foi sona laulauvavale sa faia i totonu o le aai e pei ona ta’ua e faamatalaga i luga o upega tafailagi. 

O le saunoaga a Sooalo Manu ia aogā lona toto, aogā lana amo ia sa’o ai le nuu ma toe foi le nuu i lona faavae. 

O le taimi nei ua to’afilemu le nuu ma ua leai se mea o toe gāsē. 

O le fiafiaga foi ia Sooalo Manu ua maua lona avanoa e faasoa mai ai i luga o le polokalame a le afioga ia Leiataua Savea Al Harrington Lavea ma le Tanoa Ava.