Ua galulue nei le komiti a le 4SJC88 ma Uso Malisi faapea le Kaakia Mai Group e aoao mai ma faaopoopo seleni na ofoina e le atunuu i Aukilani Niu Sila i le sa’iliga tupe a ia auaunaga tuma’oti e lua e fesoasoani ai i le nofoaga o tinā ma tamā matutua o Mapuifagalele ma nofoaga o Tamaitai Sa Monike i Samoa ma Aukilani i Niu Sila.
E 53 afe tala tupe Niu Sila na maua i lea faamoemoe i le po o le Aso Faraile ua mavae, ma ua faafetaia ai e le vasega o le 4SJC88 ma Uso Malisi faapea le Kaakia Mai Group i latou uma na agalelei ma tali atu i le latou faatalauula.
O le afioga i le Konesula o Samoa i Aukilani, le Komesina o Fefaataua’iga faapea le paia i le aufaigaluega a le Atua ma le ma’ave eseese na auai ma foa’i, ua afea foi i le faafetai a le komiti sa tapenaina le sa’iliga tupe e ala i se posiva.
Ua faaalia e le afioga Peseta Tuala Faimalotoa Allan Stowers o se sui o le komiti o tapenaga, ua faamoemoe a mae’a ona faamaopoopo uma seleni o foa’i i le vaiaso nei, ona tapena lea o se aso e tauaao atu ai seleni mo Mapuifagalele ma nofoaga o Tamaitai Sa Monike.
Ua iai le fuafuaga o le tausaga fou pe a aulia, o le a faatino lenei sa’iliga seleni faasamaria agalelei, i luga o upega tafa’ilagi.
