Ua tuanai lena vaiaso sa faagasolo ai polokalame eseese o le faailogaina o le 100 tausaga talu ona faavae le asosi poo le faalapotopotoga o tama ma teine tuai o le Malisi e pei ona sa molimauina le aaomafola o sui o le asosi o o latou aiga ma uo i polokalame sa faapena ona lafolafo ai seleni mo le faamoemoe e faameaalofa i le atina’eina o le olaga a’oa’oina o alo ma fanau a le Malisi i Samoa.
O se tasi o mafutaga a tama ma teine tuai o le Malisi i atunuu i fafo o loo aumau ai, ae o loo susu’e pea le faamalama ma silasila mai i le Malisi ma ana galuega fai, o le vasega o le tausaga 1988 a le Kolisi o Sagato Iosefo, le 4SJC88 MA USO MALISI NZ ua latou foai le seleni e 30 afe tala i le selau tausaga o le Malisi.
O le 4SJC88 MA USO MALISI NZ e toatele ona sui auai i Aukilani ae galulue soosootau’au ma le Malisi Ueligitone, faapea le Malisi Otago.
E to’alua sui o le Mafutaga ua aumau i Ausetalia ae o loo avea pea ma sui auai ma lagolago malosi pea i soo se taumafaiga.
Ua faailoa i se pepa o faamatalaga e le Pelesetene, le Afioga Peseta Muliagatele Faimalo Allan Stowers, e ese mai i le meaalofa 30 afe, o le masina fou foi e faaoo ai le fesoasoani masani o sikolasipi e tuufaatasi ai le Mafutaga i Niu Sila ma le 4SJC88 a Samoa mo le aoga.
O lenei polokalame sikolasipi e silia ma le 10 afe tala lona tau aofa’i ma ua silia i le 15 tausaga o faaauau pea.
O le Mafutaga a le 4SJC88 MA USO MALISI NZ ua lauiloa i ana fesoasoani masani i faai’uga o tausaga ta’itasi mo Mapuifagalele & Monike e galulue faatasi ai ma le KaakiaMai Group, e pei ona foa’ina ai le 50 afe tala mo ia nofoaga i le tausaga ua mavae faatasi ai ma le 5 afe tala Niu Sila mo Tamaitai-Sa Monike i Royal Oak i Aukilani.
