E tele le avanoa e toe siitia ai fesoasoani tau tupe a le malo o Saina i le faalapotopotoga o le SPREP o loo i Samoa lea o loo gafa ma polokalame mo le puipuiamalu o si’osi’omaga o atunuu o le Pasefika.
Ua faailoa e le amepasa o Saina i Samoa lea avanoa e toe faaopoopo ai ana fesoasoani mo lea faalapotopotoga tuma’oti ina ua tauaao e le alii amepasa o Fei Mingxing le siaki e lua selau afe tālā tupe Amerika i le sui faatonu o le SPREP le afioga Aumua Clark Peteru i se sauniga i Vailima o loo iai le nofoaga tutotonu o lea faalapotopotoga.
Faaalia e le sui faatonu sili, o lea tupe o le a faaaogā i le tele o ana galuega ma polokalame auā le una’ia o le puipuiga o atunuu o le Pasefika mai suiga tetele o le tau.
O Saina le isi malo o loo tu malosi e fesoasoani i polokalame o suiga o le tau o loo taulamua ai le SPREP.
