Ua faagasolo le Koneferenisi tele faaletausaga a le Ekalesia Metotisi i Samoa ma atunuu i fafo ina ua mae’a se tasi o vaega tāua i le mae’a o le koneferenisi a le au uso fealofani, ma le amatalia o le koneferenisi tele faaletausaga, o le faauuga lea o A’oa’o o loo feagai ma a’oa’oga, aemaise A’oa’o o le vasega faai’uaso, i latou ua i’u manuia le taumafai i le 4 tausaga sa aotauina ai i le Kolisi Faafaifeau i Piula.

E to’a sefuluvalu le vasega faai’uaso ae na o le sefulufitu na faauu.

O le vasega faai’uaso foi na sili aoao le susuga i le A’oa’o ia Piula Ioritana Leifi, o ia foi le kapeteni poo le Dux o le latou tausaga faauu.

O ia sa saunia se upu e faafetaia ai le pulega o le kolisi faafaifeau, ma le ekalesia aemaise o le tapuaiga a sinoti e 17 ma matua ma aiga ao alofaiva i le 4 tausaga o aooga i le kolisi faafaifeau.

Le kapeteni ma le sili aoao o le vasega faai’uaso le susuga i le a’oa’o Piula Ioritana Leifi.

O le lipoti a le Pule o le kolisi faafaifeau i Piula sa tolaulau i le faauuga ma faailoa ai e na o le 4 polokalame na a’oa’oina i le kolisi faafaifeau mai le lima o polokalame masani.

O le aofai o A’oa’o e 65 ma faletua e 43 ma le toatele o alo ma fanau laiti.

O le tausaga muamua na maua e le A’oa’o le susuga Komitiolemau Komiti le tulaga muamua, tausaga 2 na sili aoao le A’oa’o le susuga Nuusa Nuusa, tausaga 3 o le susuga i le A’oa’o o Vaivase Livigisitone na maua le tulaga muamua.

O le lipoti a le Pule o le kolisi na faailoa ai e toatolu faifeau sa aooga mo le faailoga Bachelor of Divinity peitai na faatete’a uma ona o le tulaga i le amio e mafua i le tagofia o le avamalosi.

O se vaega o le lauga faamanuia a le Pelesetene aoao o le Ekalesia Metotisi i Samoa ma atunuu i fafo i le sauniga o le faauuga a le kolisi faafaifeau i Piula, susuga Faulalo Leti Pa’aga.