E tasi le piliona ma le 800 afe tala le tuuaofaiga o se vaegatupe ua fuafua o le a faaalu e le Malo i ana fuafuaga o le atina’e o le tamaoaiga o Samoa mo le isi 12 masina o lumanai e pei ona faailoa i le tala faatatau fou o le tupe ua mae’a ona folasia i le Palemene i le Aso Lua o le vaiaso nei.
O lea aofaiga o tupe ua ausia ai le piliona tala mo fuafuaga tau tupe a le Malo, pe a fua i tala autu o le tupe muamua ma le lua ua mae’a, talu ona amata le paeaiga lona 17 a le Palemene o iai nei.
Ua molimauina i lea fuafuaga tau tupe a le Malo le faaauau o le isi 51 miliona tala mo le atinae o nuu ma itumalo e pei ona amata i le tausaga faaletupe o loo faagasolo ma ua lata ina mae’a, le tasi le miliona mo itumalo faapalota.
O gasegase auina i fafo mo togafitiga ua taoto ai se vaegatupe e 5 miliona tala, ma o se tasi lea o fesoasoani a le Malo ua molimauina le siitia pea ma faaopoopo tupe e alu ai ona o gasegase tuga ua aafia ai le ola ma le soifua o o tatou tagata ae ua lē maua i Samoa ni togafitiga faafomai.
O le polokalame a le faigamalo fou ua maua ai e tagata e iai manaoga tumau o le tino ni fesoasoani tau tupe i masina taitasi ua fuafuaina e faaalu ai se vaegatupe e 2 milion tala.
I le tulaga o aitalafu a le Malo i fafo ua faaauau pea ona faaitiitia lea o loo saofai nei le paleni i le 949 tesimale 5 miliona tala.
Ua iai le fuafuaga e tatau ona mae’a le tausaga faaletupe o muamua nei ua taoto mai le paleni fou o ia aitalafu i le 933 miliona tala ma o se faaitiitiga e tusa ma le 32 pasene.
