Ua faaauau pea ona faalauiloa i luga o upega tafāilagi e le militeri a Venezuela a latou tapenaga e puipui ai i latou pe afai e iai se gaioiga a Amerika e faia faasaga ia i latou.
Ua faifaitetele pea lenei mataupu ma ua lipotia e le CNN i lipoti aupito lata mai, ua faaauau ona vaaia vaalele tau o feoai i luga o aai tetele o Venezuela atoa ma faataitaiga o fire drills o loo faia i gataifale o le atunuu ma o ia vaaiga uma ua ta’ua i le lipoti o loo faailoa ai le tulaga o loo iai le agavaa tau militeri a Venezuela.
E le o tuumāmāina e Amerika ia gaioiga pei ona faailoa i le lipoti o loo faia foi a latou faataitaiga i le ea, aemaise le malosiaga o le navy i le atu Karipiane.
Fai mai le faatonu o le CSIS, le Centre for Strategic and International Studies, Ryan Berg, ua manino o Amerika e malosi ae e lē tatau lava ona tuumāmāina foi agavaa o Venezuela. Ina ua taunuu atu vaalele tau a Amerika ma drones i le atu Karipiane i le vaiaso talu ai, ua faailoa e le militeri a Venezuela se ata o ni masini- o radar mo le puipuiga mai Lusia e faaaoga e iloa vave ai ni au’upega poo ni osofaiga e faia faasaga atu ia i latou.
Ua tapu foi e Venezuela kamupani vaalele faavaomalo e 6 ona toe uia lo latou atunuu ina ua mae’a le 48 itula sa tuu iai e toe faaauau ai faigamalaga.
Puna o Faamatalaga: https://edition.cnn.com/2025/11/27/americas/maduro-venezuela-military-caribbean-trump-intl-latam-vis
