Ua lipotia ai nei le faagasolo o tapenaga tau tulafono i se fuafuaga e aumai i Samoa le auaunaga a le kamupani o le Starlink, o le a maua ai fesoota’iga faatekonolosi e pei o le initaneti i se tau e sili ona taugofie.
O le taimi nei o kamupani telefoni feavea’i o le Digicel ma le Vodafone o loo ofoina fesoota’iga nei i le atunuu, ae talu ai nei sa faailoa ai e le ofisa o le Pule Faatonu le Regulator a le Malo le iai o nisi ua latou aumaia satelite e maua ai fesoota’iga a le kamupani o le Starlink, o le mafuaaga lea sa fia maua ai e le Pule Faatonu ia masini e avatu e siaki ma lesitala faaletulafono mo le faaaogāina i Samoa.
O lea la ua faailoa e le Pule Faatonu i se lipoti le faia o tapenaga mo le faatūina i Samoa o le Starlink i le finagalo o le pule faatonu, le afioga Lematua Gisa Fuata’i Purcell e tāua le faatauvaga o totogi e maua ai fesoota’iga ina ia maua e tagata lautele ni totogi e taugofie ma gafatia.
O le totogi o loo maua ai nei fesoota’iga i le atunuu mai kamupani o loo ofoina ia tautua e faamaonia e le ofisa o le Pule Faatonu.
