Ua faailoa e le tama’ita’i Minisita o Tupe, le afioga Mulipola Anarosa Ale Molioo i auala o faasalalauga o loo faatupe e le malo, le vaevae ai o le vaegatupe e luaselau afe tālā, mo vaega faaupufai o loo aloa’ia i totonu o le Palemene.
Sa faatulafonoina le faamatuu atu o ia tupe mo patī faaupufai e aloa’ia i le Palemene i le maua o le aofa’iga e to’avalu o sui faipule e lagolago iai, a o seei le ta’ita’i o le Itu Agai i le tofi Palemia i le taimi o pulegamalo a le vaega e puipuia aiā tatau a tagata.
O le autū o ia tupe o le faaleleia ai o le atina’e o le lotoifale o patī faaupufai.
O le luaselau afe tālā ua vaevae e pei ona faailoa e le Minisita o Tupe ua fua le aofa’iga o le seleni e maua i le numela o sui faipule o le faafaletui.
O le vaega e puipuia aiā tatau a tagata e 14 sui faipule ua na maua le 62 afe 222 tālā ae o le 30 o sui faipule ua iai nei o le Faatuatua i le Atua Samoa ua Tasi ua na maua ai le 137 afe 777 tālā ma le 80 sene.
Sa 31 sui faipule o le faafaletui o lea patī na manumālō i le palota tele ae ua soloia le isi o nofoa sa latou maua ona o faai’uga o tagi o le palota.
O lea tufatufaga e mo le umi e lima tausaga o le paeaiga faapalemene.
