Ua unaia le faigamalo a Niu Sila ina ia saunia se visa faapitoa mo tagata Palesitina o loo i Gaza ae iai sootaga mai i Niu Sila nei.
E silia ma le 30 faalapotopotoga e aofia ai le World Vision, Save the Children ma le Greenpeace ua o latou tuuina atu se tusi i minisita ma unaia ai i latou ia siitia le latou lagolgo i le mataupu lenei.
O loo mananao foi i le faigamalo ina ia fesoasoani i le aveeseina mai o tagata Palesitina e iai ni o latou sootaga mai i Niu Sila nei ma ia tuuina iai se fesoasoani mo mea e toe nonofo lelei ai.
O le sooupu a le World Vision ua ta’ua i le televise tasi sana faamatalaga e faapea sa tali atu le malo i isi faalavelave tutupu faafuasei faapea muamua aemaise lava i le aumaia o tagata i le atunuu.
E pei ona faia i tagata Ukraine ina ua aafia o latou soifua ma meatotino i le taua ae lē gata i lea o Afghanistan lea na fesoasoani iai Niu Sila i mea e faanonofo ai i le atunuu i le mae’a o osofaiga a le Taliban.
Fai mai a latou e ma’ale’ale le tulaga o iai Palesitina ma e leai se eseesega ma isi atunuu ia sa fesoasoani iai Niu Sila.
O le mau a i latou o loo finauina le mataupu lea i le malo e faapea pe ā ma le 288 tagata Palesitina i Niu Sila a e iai o latou aiga masalo pe i le va o le 300-400 o loo i Palesitina ma o loo fia aumai i Niu Sila nei.
Ua mae’a ona faailoa e le Minisita o Femalagaa’iga, Erica Standford i se pepa o faamatalaga o loo mataitu pea e le malo le mataupu lenei ma o le faaletonu o loo tulai mai i Gaza o se mataupu e faatatau i tagata ma tuaoi ae lē o se mataupu e faatatau i visa ma o tagata o loo iai o latou aiga i Gaza o loo mafai ona talosaga mo visa lē tumau poo visa asiasi mo i latou.
