E silia i le ‘afa miliona tala le tau o le Falea’oga Tulagalua fou o le afio’aga o Samalae’ulu i Savaii ua  mae’a ona umusa, ma sa faatupe lea galuega i se foai tupe a le Malo o Iapani, i lana polokalame fesoasoani ua fausia ai foi faleaoga o nisi o nuu ma afioaga o le tatou atunuu.

O le faai’uga o le vaiaso na te’a nei na umusa ai le falea’oga e lē gata na faatupe se vaega tele i le foa’i a Iapani, ae sa iai foi ma le sao o aiga o le nuu o loo aooga o latou alo ma fanau i le A’oga Tulagalua. Na savalia e le komiti le ofisa o le Malo o Iapani mo se fesoasoani ina ua iai faaletonu o le falea’oga tuai na fausia i le tausaga e 1996.

O lea galuega ua mae’a fausia ai foi ma se hall ma le maota e faamautu iai galuega fai a le a’oga ma o le sui faipule o le itumalo o Gagaemauga Numera muamua le afioga i le sui Palemia, Afioga Tuala Tevaga Iosefo Ponifasio sa ia molimauina le tuuina aloaia atu o le galuega, faapea foi le Minisita o Aoga Taaloga ma Aganuu le afioga Seuula Ioane ma sui o le matagaluega.  

O le Aso Faraile foi na te’a nei sa molimauina ai le tatalaina o se isi galuega tele e tasi le miliona lima selau afe tala lona tau atoa, o le faaulufaleina o le Malumalu fou o le Ekalesia Metotisi i le afio’aga o Vaimoso.

E 29 matafale o le aulotu o loo galulue ai le susuga i le faifeau le tausi matagaluega susuga Auro Teve ma le faletua i a Fili. O Iuni o le tausaga na tea nei na amata ai ona fausia le Malumalu, ae sa fetaia’i ma nisi o lu’itau e pei o le alu ma nofo le galuega ona o aiaiga o vavao i lo tatou atunuu, faapea le tuai taunuu o nisi o oloa faufale mai fafo.