Umi se taimi o faatalitali tagata femalagaa’i i le malaevaalele faavaomalo o Aukilani i le aso ananafi, ma e lei faigofie i pasese na ui mai iinei e faamoemoe e faimalaga atu mo isi atunuu.
I luga o le social media i le po anapo na faaalia ai foi e lē sa avea ma Palemia o Niu Sila i tausaga ua mavae, Helen Clark, o le mea foi lea na tupu i le Aso Sa o le vaiaso talu ai.
Na ia ta’ua ai pe e lē ua tatau ea ona fai iai se fuafuaga.
Mai se tasi o le aufaigaluega a le malaevaalele i lipoti a le Herald ua ta’ua ai o se aso ese lea na iai ananafi, ma le toe taumafai e faanatinati pasese i isi faigamalaga.
O nisi o pasese na faaseā i le na o le toatolu pe toafa tagata o le vaega o tiute e siakia tusifolau, ma o le isi lea mafuaaga o le faatuai.
Na faamaonia mai e le sui o le pulega o le malaevaalele o lea na umi se taimi o taligā pasese ananafi i le malaevaalele, ae mai le Aviation Security Services le AvSec, o le faaletonu o masini e siaki ai foliga o pasese le mafuaaga o le faatuai.
