Ua aloaia ma ua mautinoa e uma atu le 2023 ma alu atu ai ma le Clean Car Discount.
A o maopoopo ai le Palemene i ana fonotaga i le vaiaso nei faapea le talanoaina o le tele o mataupu o loo moomia le faavavevave, o se tasi lea o tulafono ua toe sui.
O le tulafono lenei na aumai e unaia ai tagata e faatau taavale e alu i le eletise poo taavale nei e lē telē se aafiaga o le siosiomaga, peitai o se polokalame na fai mai lava le National ma le ACT la te aveesea pe a tu mai.
I teuteuga o le pili ma lona faitauga faatolu na ioe uma e le National, ACT faapea le NZ First ae leai le Greens, Labour ma le pati a Maori.
I le mae’a tusi aao ai o le Kovana Sili, ua aloaia ai o le aso mulimuli o le masina nei e faamuta ai.
