O se aso ese foi lenei i Ausetalia ina ua aloaia ai le avea o se tasi o ona tagatanuu ma Masiofo a le Tupu o le atunuu o Denmark, King Frederick i se sauniga aloaia na faataunuu i le taeao analeila ma maimoaina e le lalolagi.
O le tamaitai e suafa ia Mary Donaldson mai Tasmania na faaipoipo atu i le alii Perenise o Frederick lea ua avea nei ma Tupu ina ua faia le faaiuga a lona tina o Queen Margarethe 83 tausaga o le a faasee ese ma le nofoa.
O le sauniga la na faia sa moliimauina e le faitau afe o tagata ma faamanatuina e lē gata i le atunuu o Denmark ae faapea foi i Ausetalia nei, e foliga ua osi ai se feagaiga a atunuu e lua i sootaga faaleaiga.
O le Tupu ma le Masiofo a Denmark e toafā o la alo.
