E lei tau le moemitiga mo le pine auro, ae na matuā faamalieina le maimoa a Samoa ma lana tapua’iga i taumafaiga a lana tamafanau, le alii o Ato Faoagali e pei ona faamanuiaina ai nei i lana pine siliva i le taaloga o le faipelega, ina ua manumalo le alii Egelani i le la fusuaga i le vaveao analeila.
O taaloga tetele faavaomalo e pei o Taaloga a Malo o le Taupulega ma Taaloga o le Olimipeka, e lē faigofie ona saili ai ni tulaga mo le mauaina o ni pine, poo le auro, siliva pe apamemea. Lona uiga poo le ā lava le pine e ausia e se tagata tauva mai nei taaloga, o se matuā matāti’a mo lena tagata tainane lona atunuu, e ui o le faatumutumuga lava o tapenapenaga ia maua le pine auro.
O le alii o Tupuola Seua’i Ato Leau Plodzicki-Faoagali, o le pine mulimuli lea sa faatalitali i ai le autaaalo a Samoa o loo auai atu i Taaloga a Malo o le Taupulega, le Commonwealth Games e pei ona faagasolo i Birmingham i Egelani.
Ina ua manumalo Ato Faoagali i le la su’ega semifinal i le fusuaga paga mamafa poo le heavyweight ma le alii Niue o Duken Tutakitoa-William, ona see ai lea o le alii fusu mai Niue i le pine apamemea, ae faatali ai loa Ato mo le la fusuaga ma le alii Egelani o Lewis Williams i le vaveao analeila.
E lua lava la i’uga na faatalitalia e le ‘au aemaise foi le tapua’iga a Samoa o le a i’u iai le taaloga a le susuga Ato, afai e manumalo o le a maua ai loa le pine auro lona lua a Samoa mo lana autaaalo, ae afai e faia’ina, lona uiga o le pine siliva o le a ula ai le alii o Ato e pei ona ua iai nei le i’uga o lana taaloga.
O le maua ai o le isi lenei pine a Samoa ua atoa ai nei pine e 5 a le autaaalo, e 1 le pine auro ma pine siliva e 4. E 72 autaaalo o loo auai i nei Taaloga a Malo o le Taupulega 2022. O le ausia e le autaaalo a Samoa o se tulaga lelei i le faagasologa o autaalo aemaise le maua o se latou pine auro, o se laasaga maualuga ua ausia ai e le atunuu mai ana autaalo, aemaise pe a faatusatusa atu i isi atunuu tetele e pa’i miliona faitau aofai o latou tagata, ae o Samoa ua na o le 200 ma ona tupu afe lona faitau aofai, ae ua mafai ona latou manumaloina se pine auro ma pine siliva.
E momoli le faafetai i le ta’ita’imalaga aemaise susuga i alii ma tamaitai faia’oga o taaloga eseese sa tauvā ai alo o le atunuu mo Taaloga a Malo o le Taupulega i lenei tausaga 2022. O Melepone i Ausetalia o le a talimalo i isi Taaloga o Malo o le Taupulega o le a sosoo ai i le 2026.
