O loo ua faaauau pea ona iai i se tulaga lē mautonu le lumana’i o le lagolago a Amerika mo Ukraine ina ua faamaonia mai e le faufautua a Amerika i mataupu tau puipuiga, Mike Waltz ua taofia mo le taimi nei le faasoaina o faamatalaga a Amerika ma Ukraine.
O le Peresetene o Farani Emmanuel Macron ua lipotia le faia o sana faamatalaga e faatatau i se fonotaga a ta’ita’i o ami a Europa i Paris i le vaiaso nei ma sana lauga ua ta’ua ai e tatau ona sauni Farani e aga’i i luma e aunoa ma se fesoasoani mai ia Amerika.
Fai mai Macron i le BBC e fia talitonu o loo aufaatasi ma Amerika peitai e tatau lava ona nofo sauni latou ia pe afai e lē o le tulaga lea e iai.
Na taofia le toe tuuina atu o le fesoasoani tau militeli a Amerika mo Ukraine i le amataga o le vaiaso i le mae’a o le fonotaga a Trump ma Zelensky i le falepa’epa’e i le vaiaso talu ai.
E lē mailoa la poo le ā le umi o le taofiga lea ua iai le faasoaina o faamatalaga i le va o atunuu ia e lua.
Puna o Faamatalaga: https://www.bbc.com/news/articles/cwygxvvrd8do
