O le aiaiga o loo i le vaega 44 o le Tulafono Fa’avae fa’asino i le 10 pasene e sa’ili ai le nofoa fa’aopoopo o tinā ma tama’ita’i i le palemene, pe a lē maua le aofa’iga e to’aono o faipule tama’ita’i, ua toe sa’ili iai ni finagalo o le atunu’u pe fa’atumau lea vaega, pe faia iai ni teuteuga, poo le soloia.

O le galuega ua fa’asolo a le Komisi Su’esu’e o Faiga Palota, e pei ona filifilia ona sui e to’asefulu ma le lua, na amata feiloa’i ma le atunuu i itumalo i Upolu i le Aso Lua o le vaiaso nei, o loo ave ai le avanoa e tu’uina atu ni finagalo fa’atatau i le 10 pasene.

Sa aofia foi i le galuega a le Komisi Su’esu’e i le mae’a o le palota tele na faia i le tausaga e 2021 lea lava aiaiga o le fa’avae. E le tau fa’ailoaina finauga fa’aletulafono na folasia i le fa’amasinoga a le atunu’u ma aumai iai fa’aiuga fa’atatau lava i le nofoa fa’aopoopo o tinā ma tama’ita’i ina ua tuana’i le palota tele o le 2021, ma o le talitonuga o le mafua’aga lea o loo toe fesiligia ai le atunu’u iai latou ua agava’a e palota i le filifilia o sui usufono o le palemene fa’atatau i lea aiaiga o le tulafono fa’avae.

O se tasi o galuega a le Komisi Su’esu’e o Faiga Palota e pei ona fa’ailoa lautele o le lauliliu o le tulafono o faiga palota o le tausaga e 2019, fa’apea teuteuga o lea lava tulafono na fa’aofi i le palemene i le tausaga na te’a nei 2025, ae ua toe fa’aui i tua.

O le 12 o sui o le komisi su’esu’e ua aofia ai le to’aono o sui mai Puleono, to’alima mai Tumua ma le to’atasi o le sui mai Aiga i le Tai, e ono masina o le galuega a le komisi su’esu’e o faiga palota.