O mū i togavao, ma mū o meatōtino tāua ma aoga e pei o fale ma ta’avale, e tolu aso ae 71 vala’au i se fesoasoani na tali iai le pulega o le fuimū ma galuega lavea’i i taimi o fa’alavelave fa’afuase’i. O le tolu aso lea na amata i le Aso Toona’i 10 o Oketopa e oo i le Aso Gafua 12 o Oketopa ina ua mae’a le Aso Sa o le lotu a tamaiti.

Ua ave ai se isi faamanatu malosi mai lea pulega i lo tatou atunu’u ina ia mataala ma mata’alia i so’o se taimi e mafai ai ona vave iloa se fa’alavelave tau mū, poo le vave faia ai o se gaioiga e tapē ai se ogāumu o loo ola, ma se tafuna’i e ono sosolo atu ai le mālaia ma aafia se togāvao ma fa’aauau i ni meatōtino e pei o laoa ma maota.

O loo aafia pea Samoa i mūgāla tetele o loo feagai ma nisi o vaega o le motu o Upolu ma Savai’i ona o uiga o le tau ua fa’aigoaina o le Elenino ma o le tasi lea o fautuaga ia fa’aeteete i le soona faia o afi e ono tutupu mai ai ni mū tetele e lamataia ai le saogalemū o ola ma soifua o tagata ma latou meatōtino.

I le 71 o mū na faamauina i le tolu aso e pei ona fa’ailoa e le pulega o le fuimu ma galuega lavea’i i taimi o fa’alavelave faafuase’i, o le 34 o ia mu sa aafia ai togāvao, 4 mū na aafia ai fale ma le 2 o mū o ta’avale afi.

O le isi 37 vala’au o mataupu sa mana’omia ai le fesoasoani faafoma’i, e aofia ai ma vala’au mo tinā ma’itō sa fia ave i le falemai, ma vala’au o gasegase faafuase’i. Mai le aofa’iga uma o le 70 pasene o mataupu na mana’omia ai lea auaunaga a le malo o valaau i faalavelave tau mū.

Ua fa’ailoa lautele e le pulega o le tineimū ma galuega lavea’i i taimi o faalavelave faafuase’i lana auaunaga i le faai’uga o le vaiaso o le lotu a tamaiti, ma le fa’ailoa e le ofisa o le malo o Iapani i Apia o se tasi o ana fesoasoani mo lea auaunaga o le malo, o le faamautū i se sainigālima e faia i le Aso Faraile o lenei vaiaso o le aumaia o se isi loli fuimū mo lea pulega o loo tautuaina le atunuu i taimi o mu ma faalavelave faafuase’i e tutupu.