Ua aumai fa’alauaitele se va’aiga mamao a le vaega e mata’itūina gaioiga tau su’esu’ega fa’asaienisi e ta’ua o le Earth Science i Niu Sila, ma fa’ailoa ai le mā’ale’ale o tulaga e ono aafia ai atunu’u o loo i le ogatotonugalēmu o le Pasefika e pei o Samoa, i le si’itia o le numera o afā e ono āfea atunu’u i saute i sisifo amata atu i le masina o lumana’i nei o Novema e amata ai le tau o afā.

O Tokelau se vaega o Kilipati ma Samoa o loo aafia ai foi i tulaga mā’ale’ale ua valo’ia nei.

E 16 atunu’u i saute i sisifo o le Pasefika e aofia ai ma Samoa ma e fitu i le sefulutasi afā ua fa’aigoa e ono aga’i ane i ia atunu’u e aofia ai motu o le pasefika i le itu i matu, matu i sisifo ma atunu’u i le ogatotonu poo le central pacific.

O le vaaiga mamao ua faalauaitele lava e le Earth Science, na faavae i faamaumauga a ofisa o le tau i Niu Sila, le Iunivesite o Niusauelese i Ausetalia ma Ofisa o le tau i le Pasefika.

O le itu tāua i le fa’alauiloa ua aumai fa’alauaitele o le nofo tapenapena ai o atunu’u ma mata’itū, pea le tulaga o uiga o le tau le Elenino ua aafia ai nisi o atunu’u o le Pasefika, e aofia ai Samoa.

O le aso muamua o Novema e amata ai le tau o afā ae mae’a ia Aperila o le tausaga fou 2027.