Ta’ita’i e Amerika le auaunaga e tapuvae tasi iai fa’amatalaga o ni fa’alavelave tau mala fa’alenatura

O le nofoaga tutotonu o su’esu’ega a le malo tele o Amerika i le Iunivesite o Hawai’i o le a ta’ita’ia se galuega fa’atasi ai ma le malo o Samoa o le aoina o fa’amatalaga ma fa’amaumauga e tapenapena ai i ni galuega fesoasoani e fa’atino pe a tutupu ni fa’alavelave tau mala fa’alenatura poo natural disasters.

O le vaiaso nei i le faletalimalo o le Lava Hotel i Sogi na fa’alauiloa aloaia ai lea fuafuaga e le sui o le malo o Amerika i Apia ma o se galuega o le a fa’atino i totonu o le 12 masina.

Ua fa’aalia e le sui o lea malo i lo tatou atunu’u le ali’i o Matthew Younger, o lea taumafaiga o le a fa’asaoina ai ola ma soifua o tagata i Samoa ona o le isi lea o manulautī tāua a lona malo o se pā’aga tōtino a Samoa.

I se tasi o tala i le vā nonofo ai o Samoa ma le malo tele o le Iunaite setete o Amerika, o le vaiaso nei o loo taula ai i le uafu tele i Apia le va’aleoleo o le gataifale o lea malo le U.S Coast Guard Oliver Cutter.

O le autū o lana malaga o le faia o a’oa’oga ma auaunaga i Samoa o loo fa’amalosia le tulafono e pei o le Matagaluega o Leoleo, Falepuipui ma le Toefuataina. Ua fa’ailoa i se pepa o fa’amatalaga o lea va’aleoleo o le gataifale ua fausia fa’apitoa ma fa’atotoga i masini fa’aonapo nei e tali atu ai i leoina o ogasami o le Pasefika aemaise o gaioiga solitulafono e pei o le feavea’i fa’atulafono o tagata ma fuala’au fa’asāina, faapea va’a fagota tetele latou te fagotaina ogasami o atunu’u i lenei itu o le lalolagi i ni fa’aiuga solitulafono. O le setete o Hawai’i e faamautū ai le U.S. Coast Guard Oliver Cutter ma lona auva’a.