Ua le’o toe umia faaletulafono nei e le Mālō o Samoa le vaa leoleo o le Nafanua ae ua liliu atu nei e umia e le Mālō Ausetalia.
Ua faia lea tulaga ina ua maea ona sailiili aafiaga ma faaletonu o le vaa leoleo lea na oso i luga o ni ‘amu tetele ma pa’ulia ai ma iloa ai le matuā telē o le afaina o se vaega i lalo o le vaa.
I se pepa o faamatalaga faalauaitele ua soo faatasi ai le Mālō o Ausetalia ma le Mālō o Samoa ua faailoa ai ua lē toe iai se malosi atoatoa i le vaa leoleo o le Nafanua ll e mafai ai ona toe faaaoga.
O lona uiga ua manino mai i lea faamatalaga e le’o toe mafai ona faaaoga mo galuega masani na leoina ai ogasami o le atunuu faapea isi galuega sa faatino e le vaa leoleo.
Ua aumai lea faasalalauga i le tuanai ai o ni ripoti i totonu o Ausetalia ma taua ai le ono totogi e le Mālō Samoa o faaletonu o le vaa o se meaalofa a Ausetalia i lana polokalame o le puipuiga.
E $30 miliona tala Samoa le tau o le vaa leoleo fou ma e le’i atoa se lua tausaga talu ona auina atu le vaa i le atunuu ae o lea ua faaleagaina ona o tulaga na tutupu mai i le masina o Aukuso i le tausaga na te’a nei. O le faaaogaina o le
Nafanua ll e momoli ai nisi o leoleo i Savaii mo le faatinoina o le puipuiga ma tausi le filemu ina ua tapena le solo tetee a le vaega faaupufai a le HRPP ma ona sui lagolago e faasaga lea i le faamasinoga na mafua ai ona pa’ulia.
O le Kapeteni o le vaa leoleo ua maea ona faia sona faamasinoga faaleoleo ma ua faamaonia lona faatamala i le faatinoga o ona tiute ma ua faaauau pea ona galue ae ua le’o toe maua lona tulaga faaleoleo o le Super Intendant sa avea ai ma Kapeteni o le Nafanua ll.
