Ua lē taunuu le faatautoga

O le tauaofiaga lona 17 o le Palemene o Samoa lea na fuafua mo le taeao nei ua lē faataunuuina.

I se felafolafoaiga a le taitai a le Faatuatua i le Atua Samoa ua Tasi , Fiame Naomi Mataafa ma le Failautusi o le Ofisa o le Fono Aoao Faitulafono Tiatia Lima Graeme Tualaulelei i le taeao nei na taua ai e Tiatia  “o se faatonuga mai le Minisita o le Fono Aoao Faitulafono faapea ma le Fofoga fetalai ina ia utagia le poloaiga na tuuina mai i le po ana po e tolopoina ai le tauaofiaga a le Palemene lona 17 a Samoa”

Tali Fiame e fesiligia “poo ai le Fofoga fetalai lea ua faia le faaiuga e le’i faatautoina se fofoga fetalai ma sui faipule.”

Na ia taua foi ” o ai o le a tua ai Samoa, ua tuu le pule a Samoa ae ua fai le pule a le tagata toatasi”

O se felafolafoaiga na vaaia ai le lē mau o le toovae a nisi o tagata lagolago ma ua aoga ai le puipuiga malu a malo auā lava se saogalemu o Samoa.

Na i’u lava ina talosaga le taitai o le FAST i a latou sui lagolago ina ia tuu atu i le latou vaega faaupufai e saili se isi auala talafegai mo le faafituali ua tulai mai ae taua pea le nonofo filemu ma aua le to’ia le va.

O fafo ane o le falefono o loo faatumulia i sui a faipule o le FAST ma o latou aiga tālia ai se isi gaioiga e tatau ona fai , ma o loo auai ai ma le Tama Aiga le afioga ia Tuiatua Tuoua Tamasese Efi ma le Masiofo ia Filifilia Tamasese.

LAUILOA

Keep uptodate with Radio Samoa activity & promotion

* indicates required