Ua iai se lapataiga faailoilo mo faiga faigamalaga a vaalele e lua i Melepone i le vaiaso talu ai, i tagata Niu Sila sa iai i luga o nei faigamalaga ua tapaina e nonofo i fale seiloga ua valaau le laina o telefoni o soifua maloloina mo se fautuaga.

Faaalia e le Te Whatu Ora – le Matagaluega o le Soifua Maloloina – o nei faigamalaga a vaalele i Melepone, o le faigamalaga a le Emirates numera EK408 mai Dubai i le aso 14 o Fepuari, ma le faigamalaga a le Singapore Airlines numera SQ217 mai Singapore i le aso 19 o Fepuari.

Sa logoina e le pulega o soifua maloloina a Ausetalia ia le Soifua Maloloina a Niu Sila e faapea, o tagata mai Niu Sila sa iai i luga o nei faigamalaga, faatasi ai ma i latou sa faamaonia le aafia i le misela.

Ua vave tapa ai e le Matagaluega a le Soifua Maloloina ia soo se isi i Niu Sila sa iai i luga o nei faigamalaga e fesootai atu le tautua a le soifua maloloina.

O nisi sa iai sootaga ma i latou ua aafia e tauau ua mae’a lava ona faalogoina auga o le misela, ua tapa ai le vave fesootai o le laina o soifua maloloina.

O le toa 13 o tagata sa iai i luga o nei faigamalaga, sa malaga ane i Niu Sila, e pei ona faaalia ai e le pulega o le soifua maloloina, e oo mai i le taimi nei ua faamaoniaina i latou.

Talu ai nei, sa lapataia ai e fomai, o le pipisi o le misela, e foliga e tupu mai i Niu Sila i le tausaga nei, talu ai, e toatele naunau tagata e lē o faia tuipuipui o le misela.

Sa faaalia foi e le alii Minisita o le Soifua Maloloina, Shane Reti, ua faaopoopo sona atuatuvale e uiga i le tulaga lamatia o se pipisi o le misela, ae patino lea i le tilotilo i le alu i luga o le numera o tagata e aafia i atunuu i fafo.

I fuainumera a le Faalapotopotoga a le Soifua Maloloina a le lalolagi – World Health Organisation – ua faailoa ai le matuai maoa’e tele o le siitaga o le numera o tagata sa aafia i Europa i le tausaga ua mavae – e tusa ma le 42,200 o tagata sa aafia, pe a faatusatusa atu i le 941 sa iai i le 2022.

I le 2019, o le pipisi o le misela i Samoa, e 83 ola sa fano ai, e mafuli lea i tamaiti, ma faaalia ai e Reti, sa laki Niu Sila i lea pipisi i le 2019, i le leai o se ola na fano ai.

Ae peitai sa ia ta’ua ai, o Niu Sila sa latou auina mai le misela i Samoa, e moomia ai ona manatua, o se faama’i e fano ai ola o tagata.