Ua faailoa mai nei e le Ofisa o MP Teanau Tuiono e faapea, o lea ua faamautū le Aso Lulu, 20 Novema i le aoauli mo le tolaulauga mulimuli o le Citizenship (Western Samoa) (Restoration) Amendment Bill mo le pasia e avea ma tulafono.
Saunoa le tofa Leulumoega Teleiai Puni, o le talosaga sa tuuina atu i le susuga i le faipule ia MP Teanau Tuiono ina ia vave ona maua se avanoa i le Palemene mo le tolaulauga mulimuli, ona o loo afe moe pea le faigamalaga a nai tuaa matutua ma lē maua ai lenei faamanuiaga.
E pei ona silafia, o le Citizenship (Western Samoa) (Restoration) Amendment Bill, o le pili taufaaofi a MP Teanau Tuiono o loo finauina ai le toe faafoi mai o le sitiseni Niu Sila o tagata Samoa e pei ona iai le faai’uga a le Faamasinoga Maualuga i Peretania le Privy Council ae sa toe ave’eseina e le tulafono a le Citizenship (Western Samoa) Act 1982 Bill.
Saunoa Teleiai, ‘Samoa, o la tatou sailiga malo tele lea o loo feagai ai i le taimi nei poo fea lava o le lalolagi o loo e alala ma papa’aao ai.’
‘Ua sao mai le amo uta ma ona fita (tolaulauga muamua), sao mai le amo tai ma ona lu’itau (tolaulauga lona lua); a o lea ua fotua’i mai le toe aso nai Moamoa (tolaulauga lona tolu).’
‘O lea foi ua tau ‘ai o Alae i le teuteuga sa tuuina atu e le NZ First mo le faamāmā avega i le totogi mo talosaga i le fono usu a le Committee of Whole House i le vaiaso na te’a nei.’
‘E momoli ai le faafetai tele i sui o le Palemene o Niu Sila ua lagolagoina lenei mataupu, ae sili ai le agaga faafetai i tupu ma tamalii, faletua ma tausi, e oo lava i alo ma fanau sa tofu sao i lenei sailiga; e ui ina toaitiiti, ae o le gagao a ato tetele.’
O lenei ua amata tapenaga mo le masii atu a le mamalu o le aulagolago ia auai i le Palemene o Niu Sila i le Aso Lulu, 20 Novema e molimauina lenei aso o le a faamau i le talafaasolopito o Samoa ma Niu Sila.
Saunoa Teleiai, ‘e lē tatau ona o tatou alo tamala i le aso ua atofa e le Palemene o Niu Sila e ui ina utiuti le taimi.’
‘O le resitala mai o lau lagolago ma lau imeli o le a mafai ai ona e mauaina i le imeli o faamatalaga pe a to manū o la tatou sa’iliga malo ma tatala mai talosaga mo le faauluina atu.’ ‘
‘E lē gata i lea a o nisi o vaega o loo fia malamalama ai lo tatou atunuu e uiga i lenei mataupu.’
O faamatalaga uma ma faamaumauga o loo tuuina atu o loo tatala le avanoa e faasoa atu ai i aiga ma soo se Samoa, ma o loo tatala foi le avanoa e resitala sa’o mai ai o latou suafa ma imeli ina ia mautinoa lo latou mauaina o lenei fesoota’iga.
O loo iai le avanoa e mafai ona auai soo se tasi e fia molimauina le tolaulauga mulimuli i le Palemene, peitai e moomia le resitala o lou suafa mo security clearance e mafai ai ona e ulufale i le Palemene i lea aso.
O le fautuaga, aua ne’i misi lou avanoa e te malaga ai ma e molimauina lenei aso sili ona tāua.
