Faagasealii Sapoa Feagiai & Aliimalemanu Alofa Tuuau
Faagasealii Sapoa Feagiai & Aliimalemanu Alofa Tuuau

Ua filifilia sui tamaitai e toalua mo nofoa faaopopo o tamaitai i le Palemene

O sui tamaitai e toalua a le vaega faaupufai e Puipuia Aiā Tatau o Tagata le HRPP lea ua faamanuiaina i nofoa faaopoopo e lua e atoa iai le aofai o nofoa e 6 mo tamaitai i le Palemene. 

O tamaitai ia e toalua ua maua nofoa faaopoopo ia e lua ina ua faaaoga e le Komseina o Faigapalota le aiaiga o le 10% o le sui tamaitai lea na tauva mai i le palota laititi a le itumalo Aleipata Itupa i Lalo o Faagasalii Sapoa Feagia’i ma Aliimalemanu Alofa Tuuau na tauva i le palota tele mo le itumalo o Alataua i Sisifo. 

Ua tutusa ai nei i le ta’i tolu nofoa o tamaitai ua umia e le vaega e Puipuia Aiā Tatau o Tagata e pei ona sa toe filifilia le sui faipule tamaitai o le itumalo palota o Gagaifomauga No.1 le tōfa Faimalotoa Kika Stowers Ah Kau i le palota tele mo le vaega a le HRPP.  

E toatolu foi sui faipule tamaitai a le vaega faaupufai a le Faatuatua i le Atua Samoa ua tasi na filifilia mai i le palota tele. E manino mai i nofoa faaopoopo e lua  ua atoa iai nofoa e 6 o tamaitai o le faaiuga o le palota tele ia Aperila o le tausaga nei ma le faaiuga o palota laiti e ono ua maea atu nei ua faaaoga i le faavasegaina o palota na maua e sui tauva tamaitai e saili ai sui e ausia le 10% ma maua ai le aofaiga e ono o nofoa o tamaitai.   

I le faaiuga aloaia lava o palota laiti ua faamaonia mai e le Ao Mamalu o le Malo ua tulai mai ai e leai se suiga o le taunuuga na iai lea faiga filifiliga ma vaaia ai le manumalo o le FAST i nofoa e 4, faaopoopo ai ma le nofoa o Falealupo e lei palotaina ona maua ai o nofoa e 5, o le aofaiga o nofoa a le FAST e 31. O le HRPP e lua nofoa na faamanuiaina ai lea vaega faaupufai i palota laiti ma sui tamaitai faaopoopo e lua ona maua ai lea o nofoa e 4, o le aofaiga atoa o nofoa a le HRPP e 22.  O lona uiga ua 9 nofoa ua mamao ai nei le FAST ma le HRPP e fua lea i le nofoa e tasi na maua ai e lea vaega faaupufai le numera silia o nofoa e 51 o le Palemene ua fausia ai le faigamalo fou ina ua maea le palota tele ia Aperila.

Ua faatumauina ai nei le avea o le FAST ma faigamalo fou mo Samoa lea ua savali i le 4 masina talu ona tulai mai e taitaia le atunuu. O le aofaiga o sui o le Palemene ua iai nei ina ua aloaia nofoa faaopopo o tamaitai e lua i aiaiga o le 10% ua 53. O le 31 foi o nofoa ua manumalo ai le FAST ua o latou lē maua ai le 2/3 o le aofaiga o nofoa e 53 ua iai nei le Palemene lona 17. O lona uiga e 35 nofoa e maua ai le 2/3, e to’a fa faipule o le ituagai e maua ai le 2/3 ma o se galuega lea e saili ai e le itu o le malo e lagolago atu i ni sui faipule o le HRPP lea ua avea nei ma Ituagai.

Ae o le faasilasila ai o le faaiuga aloaia o faigapalota laiti e ono (6) ma faailoa ai ma nofoa faaopoopo e lua o tamaitai o loo taoto i le faamasinoga le talosaga a le Komesina o Faigapalota o loo tauave e le Loia Sili a le malo o loo tatalo atu ai i se poloaiga e faamanino ai le 10% o nofoa o tamaitai. Na valaau le talosaga lea i le amataga o le vaiaso ma o lea ua tolopo atu i le vaiaso fou.

Share on facebook
Share on twitter
Share on email
Share on whatsapp
Scroll to Top

Keep uptodate with Radio Samoa activity & promotion

* indicates required