Ua faailoa faamaisega ma moomooga alofa o aiga, uo ma ē masani faapea sui o le Ekalesia Worship Centre a Samoa i luga o upega tafailagi i le tuumalo ai o le taitai o le Ekalesia le susuga Aposetolo Viliamu Mafoe.
O Aposetolo Viliamu Mafoe na faavaeina mai le Ekalesia Worship Centre Christian Church i le tausaga e 1997 ina ua ia maua se valaau paia a o avea o ia ma taitai o le galuega Autalavou mo Keriso le YFC.
O se taitai ua iloga lona sao i le atunuu aemaise o sui o lana ekalesia e le gata i Samoa ae faapea le lalolagi atoa. E faamanavaina e le Atua galuega a le Aposetolo ua 66 tausaga o lona soifua.
E momoli ai faamaisega i aiga o le alii faifeau ma ē masani aemaise le tina ma le nofoaalo faanoanoa.
E lei faamautu maia i le taimi nei toe sauniga o le alii faifeau, ma o le a iai nisi lipoti mulimuli ane o tapenaga a le ekalesia mo le latou faamavae atu i lo latou taitai.
