Ua valaau le Matai Sili i se tasi o tamalii o le atunuu sa tauaveina le tofi faipule o le Palemene mo le itumalo faapalota o Falealupo mo le 26 tausaga, le afioga A’eau Dr Peniamina Leavai.
O se tasi o toe Ulutaia i upufai o le malo o Samoa lea na tauva mo le taimi mulimuli i le palota tele o le tausaga e 2016.
Na ulua’i pale i le tofi Faipule i le tausaga e 1985 o se sui lagolago o le vaega faaupufai e puipuia aiātatau a tagata a o ta’i tolu tausaga le umi o paeaiga faapalemene.
Na filifilia i le tausaga e 1988 e avea ma Fofoga Fetalai o le Palemene se’ia oo i le tausaga e 1991, ae o le palota tele o le tausaga e 2001 sa tauva ai i le vaega faaupufai o le SNDP.
O se palota faigata lea mo le afioga A’eau Peniamina ona o le taimi o loo faate’a ma le faiganuu a Falealupo peita’i na manumālō ma toe avea ai ma sui faipule o lona itumalo.
O lana tautua i le Malo ma le atunuu e ala i le nofoa o Falealupo sa avea ai ma se tasi o sui faipule lagolago i le vaega faaupufai o le Tautua Samoa se’ia oo ina mālōlō mai le tofi i le mae’a o le paeaiga faapalemene lona 16.
O le afioga A’eau Dr Peniamina Leavai o se tasi o foma’i faauuina mo oloa poo nifo, ma ua tele tausaga o galue ai i le malo, ma faatino mulimuli ai lana lava auaunaga tuto’atasi.
Ua 83 tausaga o lona soifua ma o le Aso Gafua o le vaiaso nei na tuumalo ai.
