O le malaga atu i Ausetalia o le afioga i le Fofoga Fetalai o le palemene o Samoa ma lana aumalaga i se vala’aulia a le Palemene o lea malo, na āfea ai le aai o Pirisipeni ma fai lotu tamaiti ai i se ekalesia Samoa ma mafuta atu ai i nisi o le mamalu o Samoa i lea vaega o Ausetalia.

Sa asiasi ai foi i le nofoaga o a’oa’oga faaleoleo mo le Pasefika ma feiloa’i atu ai i se tasi o malu o le malo mai Samoa o lo’o a’oa’oina i le nofoaga le susuga i le Ta’ita’i Leoleo Asiasi poo le Police Inspector o Ropati Peniata.

Ua fa’ailoa i se pepa o faamatalaga lea faiga malaga a le Fofoga Fetalai le tofa Auapa’au Mulipola Aloitafua, ma sui faipule e to’atolu le afioga Loau Solamalemalo Keneti Sio, afioga Leatigaga Matafai Lauina Iiga Tato ma le afioga Leilua Sagato Karene Sosene, sa āfea muamua ai le a’ai o Pirisipeni ma fa’aauau atu ai i Canberra le laumua o Ausetalia o loo iai le maota fono o le palemene o lea malo.

Samoan Parliamentary delegation in Canberra were welcomed to the Australian Parliament House by Senator the Hon Sue Lines, President of the Senate, and the Hon Milton Dick MP, Speaker of the House of RepresentativesPhoto: Talamua Online News
The delegation also visited the Australian Federal Police’s Pinkenba Hub, which supports training and capability development for police across the Pacific. There, they met Samoa Police Inspector Lopati Peniata.Photo: Talamua Online News

Sa feiloaʻi ai le Fofoga Fetalai ma le fofoga o le fono o le palemene o Ausetalia ma momoli ai le fa’afetai i le Fofoga Fetalai o le palemene o Samoa ona o le lagolago ua avea ai le fofoga fetalai o Ausetalia ma Pelesetene o le iuni a palemene le Inter parliamentary Union.

Sa feiloa’i ai foi le au malaga ma nisi o faipule o le Senate a le palemene o lea malo. O se vala’aulia sa faatalanoa ai galuega faapalemene ma tiute tauave o itu faaupufai e agaia se faigamalo. Sa molimauina ai e le au malaga a le palemene o Samoa se tasi o taualumaga taua i fonotaga faapalemene a Ausetalia o le taimi o fesili ma tali lea e tuusa’o ai fesili a faipule i le palemia ma le faigamalo i mataupu eseese e manaomia ai ni tali.

O le fa’aiuga o le vaiaso ua mavae atu nei na toe taliu ai i fanua le faiga malaga a le Fofoga Fetalai ma sui faipule e to’atolu o le palemene ma nisi o ofisa sinia o le Ofisa o le Fono Aoao, ao lumana’i le toe tauaofia o le fono usu a le fono aoao faitulafono a Samoa i le Aso Lua o lenei vaiaso.