O taumafaiga a nisi o auaunaga tuma’oti i le atunu’u e lagolago taumafaiga e puipuia ai le aafia o le siosiomaga o Samoa mai le faaleagaina i otaota lafoa’i e pei o oloa e gaosia i le uga e pei o fagu, ua fa’ailoa ai i le mae’a o se tasi o taumafaiga o le aoina o ia ituaiga o otaota ua lafoa’i, le maua o le 198 o ato tetele ua tutumu i uga sa aoina i le Aso Toonai na te’a nei i luma maota o le malo i le eleele fou.

O lea aofaiga ua fa’aalia o se ata va’aia o le sologa lelei o lea taumafaiga ona o le fia fa’asaoina ma le puipuia o le si’osi’omaga o le atunu’u mai uga ua lafoa’i, e fitu sene le tau o le fagu pa’u ma isi itu’aiga o oloa e gaosia i le uga o loo fa’atau e ia auaunaga tuma’oti o loo latou toe faia se galuega e toe feliua’ina pe recycle ai uga ina ia mafai ona toe fa’aaoga i nisi auala ma faiga ae taofia ai le lefoa’i solo ma fa’aleagaina ai le si’osi’omaga.

O le aso 24 o Oketopa e oo atu ai le galuega o le fa’atau mai o uga i Falealili lea o le a faia i luma o le faleoloa o Mavis i Sapo’e, aso 31 o Oketopa o Sa’anapu i le itumalo o Safata, aso 7 o Novema o Vaitele tai i le nofoaga o loo iai le faleoloa o le Farmer Joe, ae o le asō foi lea e fa’atino ai i le itumalo o Aana Alofi 2 i le nofoaga o loo iai le falea’oga tulaga-lua i Fasitoo tai.