Ua faamaonia mai i lipoti lata mai a le Matagaluega o le Soifua Mālōlōina le pa’ū maualalo ai o le aofa’iga o tagata i le atunuu ua aafia i le Koviti i totonu o le 48 itula lea ua faamauina le to’a 31 fou ua pesia.
O lea ripoti na tuuina mai i le asō sa tuufaatasia mai le aso 21 o Iuni i le aso 23 o le masina lava lenei i le itula e 2:00 i le aoauli.
I lea aofa’iga e to’a 29 o le mamalu lautele o le atunuu a o le to’alua na faimalaga mai fafo. Ma ua siitia ai le aofa’i o ē ua aafia (community & border) i le faama’i i le 14,843. O loo tumau pea le aofa’iga o i latou ua maliliu i le to’a 29.
E to’atasi o loo faanofoesea i nofoaga faapitoa i le Falema’i i Motootua ae leai se tasi o i le Potu Tigaina poo le ICU. O loo faaauau pea ona tuualalo mai le Matagaluega i le atunuu ina ia tausisi i le faia o tali fofoga ma faaaogā le lua mita le mamao mai le isi tagata.
