O nisi o faleoloa tetele i Ausetalia o le Kmart ma le Target ua lipotia o le a tuufaatasia ina ia tasi ai le auaunaga.

Fai mai le 9News o le fuafuaga a le Wesfarmers e faaaofia mai le Target i le Kmart o se gaioiga ua faamoemoe o le a lē gata ina faaleleia ai le aofai o a latou faatau ae o le a fesoasoani foi i le auaunaga ma le faaaogaina o auala faatekonolosi.

Ae o le a lē tele se suiga e matauina e tagata e pei ona faailoa i le lipoti faapea foi se finagalo o le faaululuga o le Kmart, ua ta’ua ai o pisinisi masani lava mo latou a o taumafai ai e taulai le vaai i le saunia o oloa lelei mo le faitau afe o le au faatau i Niu Sila ma Ausetalia e filifili e faatau ia Target poo Kmart i aso taitasi. 

Ua faailoa foi la e le pulega o le a iai nisi e vāea ae o le a avanoa lava nisi galuega faaopoopo i le agai atu i le tausaga fou.

Ua faailoa foi o le suiga ua faia e afua mai i tulaga malosi o pisinisi ae lē o se vaivaiga.

E le o ta’ua pe o le a iai se suiga i le tau o oloa i auaunaga ia pe a faatino lea tuufaatasiga.